554w
འགྲུལ་བཞུད་པ
(Hi No. 3459805)
# 《ཡིག་ནོར་འདི་དག》འཇུ་སྐལ་བཟང་།
ཁོ་ཚོས་ཡིག་ནོར་བྲིས་བཞག ཡིག་ནོར་འདི་ཚོ། ང་ཚོའི་མུན་པ་རེད། འུག་པ་རེད། ཁྭ་ཏ་བཞིན་ཨག་སྐད་འཛེར་འཛེར་འབྱིན་གྱིན་འདུག སྡིག་སྲིན་བཞིན་ཡན་ལག་ཤིགས་ཤིགས་འགུལ་གྱིན་འདུག གོས་སྲུབས་སུ་འཚང་བའི་སྲོ་མ་བཞིན་བསལ་དུ་མེད་པར་འདུག དེ་ཚོས་ང་ཚོར་སྐྱི་གཡའ་རུ་འཇུག་བཞིན། ཞེ་མེར་དུ་འཇུག་བཞིན། ཟུག་རྔུ་སྐྱེད་བཞིན། དངངས་སྐྲག་སློང་བཞིན་འདུག ཡིག་ནོར་ཚོས་གཞུང་ལུགས་ན་གཡེང་རྐྱལ་བྱེད་ཀྱིན་འདུག བསླབ་བྱ་ན་གཡོ་སྟོན་བྱེད་བཞིན་འདུག རྩོམ་རིག་ན་བཅོས་འཛུམ་སྟོན་བཞིན་འདུག ལོ་རྒྱུས་ཀྱི་འགག་མདོ་ན་རྩོད་གཞི་སློང་གིན་འདུག་ཅིང་། མཚམས་ཁང་གི་སྒོ་དྲུང་ནས་ལོག་སྟོན་བྱེད་ཀྱིན་འདུག ཐ་ན་སྨན་རྐྱལ་དུ་འཛུལ་ནས། ཤི་གསོན་གྱི་གྱེས་སོ་ན་བརྡ་ལོག་རྒྱག་གིན་འདུག
མདོར་ན་ཡིག་ནོར་དེ་ཚོས་ཆོས་ལོག་འཆད་ཀྱིན་འདུག་ལ། སྲིད་ནོར་དུའང་འཁྲིད་ཀྱིན་འདུག འདུག་སྟེ། ཁོ་ཚོས་ག་སར་ཡིག་ནོར་བྲིས་བཞག གཞུང་ཡིག་ན་ཡིག་ནོར་བྲིས་བཞག ཐམ་ག་ན་ཡིག་ནོར་བྲིས་བཞག སྒོ་བྱང་ན་ཡིག་ནོར་བྲིས་བཞག ཡིག་ནོར་གྱི་སྙན་ཞུ་ལ། ཡིག་ནོར་གྱི་ཆོག་མཆན་འགོད་ཅིང་། ཡིག་ནོར་གྱིས་ལག་བསྟར་བྱེད་ཀྱིན་འདུག ད་ལྟ་དེ་ཚོ་ཡམས་ནད་བཞིན་ག་སར་ཁྱབ་ཟིན། ནམ་མཁའ་ནས་འབབ་ཀྱིན་འདུག གྲོང་མཐའ་ན་ཉུལ་གྱིན་འདུག ལྷས་འདབས་སུ་རུལ་བཞིན་འདུག ང་ཚོས་ཁ་ནས་ཡིག་ནོར་ཟོས་ཟིན། ང་ཚོས་རྒྱབ་ཏུ་ཡིག་ནོར་གྱོན་ཟིན། ད་ལྟ་ང་ཚོ། ཡིག་ནོར་དང་ཁ་འབྲལ་ཐབས་མེད་པར་གྱུར་འདུག ཁོ་ཚོས་ག་སར་ཡིག་ནོར་བྲིས་བཞག ང་ཚོས་གཙང་པོ་དང་ལོ་རྒྱུས་ཀྱི་མགོ་ཁུངས་ནས། ཡིག་ནོར་གྱིས་རྙོག་གིན་འདུག མཐོ་སྒང་གི་རུས་སྒྲོམ་ཧྲིལ་པོ་ཡིག་ནོར་གྱིས་ཟ་གིན་འདུག ཡིག་ནོར་ཚོ་མའི་མངལ་དུ་ཞུགས་ཟིན་པས། རིགས་རྒྱུད་ཕྱི་མ་ཚོ་རྙོག་འཐོམ་མེར་བཏང་འདུག ཁོ་ཚོས་ག་སར་ཡིག་ནོར་བྲིས་བཞག ཨ་ཁ་ཁ། ཁོ་ཚོས་ངའི་ཆེས་གཅེས་ཐང་ཆེ་བའི་རུས་མིང་དེ། ཡིག་ནོར་བྲིས་བཞག ངའི་དུར་བྱང་ལ་ཡིག་ནོར་བཏབ་བཞག
སྲིན་པོའི་རྒྱལ་པོ། :ཡག་གི་ཡ554w